الأربعاء، 21 يناير 2009

تحديث للtagging

سلام عليكم و عوده بعد توقف....للأسف العودة برده مش بكتابة أنما المره دي بتاج
يذكر اني غيرت اجابات كتير لان الناس زعلوا مني...هما برده ميعرفونيش عالطبيعه وانا ليا اسلوب غلس شويه في التريقه او الهزار...وللتوضيح برده فانا بتريق على نفسي في معظم الإجابات..محدش يزعل مني يا جماعه
....و للتوضيح السريع فإن تاج دي مش تاج الملك و لا تاج الجزيرة ولا تاج الدين...ده تاج ده بمعنى ((tagging)) اللي هي يعني ماركينج او توضيح او ما يوضع على السلعة لمعرفة سعرها...افتح المورد تلاقي الكلام الفاضي ده كله...ما علينا.... شكرا للأخ البرنس محمد الجوهري اللي أهداني التاج داهون...داهون طبعا امال ده ايه.... و ده شرف ليا يا معلم أنك افتكرتني و حطتني ضمن زمرة اختياراتك الكريمة.... وعلى غرار المنتديات...مشكووووور يا أخي.... هجاوب عال((تاجينيج)) و وعد إن شاء الله إني ارجع اكتب بقى عشان كفايى أنتخه كده
ومعلش مفيش الوان لأن البلوجر بايظ و مبيلونش ولا بيخطط و مش عارف اصلحه ازاي....

السؤال الأول:- بدأت التدوين إمتى و دخلت العالم ده إزاي؟...انطق اتكلم

ج:- مقدرش احدد تاريخ محدد...لأني بدأت مرتين...مرة في مارس 2007 و كان ليا مدونة ساخرة مش هقول اسمها و لا اسم البروفايل اللي انا حذفته أساسا.... رغم أنها كانت كتابات كويسه بس حذفتها و انا حر ... المرة التانية في ابريل 2008...و دخلت العالم إزاي...سمعت عنه فدخلته...سؤال غريب...

السؤال التاني:-إيه كان انطباعك في بداية التدوين؟

ج:- أولا حسيت بإثارة شديدة و حماس مشبوب ناحية الموضوع...خاصة مع بداية التعليقات و اهتمام البعض بكتاباتي....و كان اهتمامي بإني اطور من اسلوبي في المقام الأول...بس برضه مكانش فيه جمهور ...فبدأت أتابع بعض المدونات على أساس اجتذاب الناس بطريقة قرب قرب....فبصراحة جالي إحباط و خيبة أمل....لأني اكتشفت أن الوضع قائم على المجاملة الصريحة التي لا أبالغ لو وصفتها بالنفاق...و تلاقي كلام أقل ما يقال عنه أنه أهبل و التعليقات عليه فوق الميت ميتين تعليق... هتقولوا عليا حقود... لأ والله...أنا مش بحقد على العدد أنا بتكلم على اللي مكتوب في التعليقات من " الله عليك...جميل اوي...تسلم إيدك...سبحان العاطي الوهاب...أعد...إلخ.."... و فعلا بتلاقي الكلام واقع و مفهوش ريحة الأسلوب الأدبي.... عشان كده قررت إني اكتب عشان يبقى ليا مخزون كتابي موجود في أي وقت و جمهوري اللي بيتابعني و بيعلقلي ناس محترمة جدا اتشرف فعلا بمتابعتهم و اعتقد و لله الحمد أن تعليقاتهم عمرها ما شابها شبهة رياء مش لإني بكتب كويس...بس لأنهم كتير بينقدوني و ده بيدفني لأدام...ولاحظ تطور الأسلوب دلوقتي عن زمان...أعتقد إني حققت غاية كبيرة من التدوين...أنا بنجح فعلا....و الحمد لله

السؤال التالت:-مين أكتر حد بتحب تعليقاته ع البوست الجديد؟
ج:- الإجابة التقليدية...كلهم...أي حد بيعلق بحب تعليقه و احطه على راسي من فوق...ما عدا علاء ابن خالتي عشان بيخش انونيموس و بيكتب حاجات دمها تقيل فمبردش عليه و بعاقبه بطريقتي "بغلبه تسعه صفر في البلاي ستيشن"...بس اي حد بيعلق بيبقى بيس خالص و بيفرحني اخر حاجه
انا بتشرف بتعليق اي حد حتى لو نقدي.......

السؤال الرابع:-إيه اهم حاجات اتعلمتها م التدوين؟
ج:-ممم....عرفت ناس كويسة كتيييير اوي....ناس محترمة و على خلق....أسلوبي الكتابي تطور بشكل ملحوظ و بقى ليا فكر أدبي معقول...خاصة في مدونة قصاصة ورق صاحبة الشعبية الأكبر من دي.... و اعتقد أن ما أقدمه بيعجب الناس و بيحترموا إسلوبي اللي أنا لحد دلوقتي لسه مش راضي عنه..... و على فكرة انا عشان ارضي الناس الحلوه دي و احافظ على أسلوبي و مكانتي عندهم بيطلع عين أهلي و انا بجيب الفكرة و المحور و الأسلوب و البداية و العقدة و النهاية و الرمز و المغزى....شغلانه سوده يعني رينا يعيني عليها...بس انا بعتز بيها....و التدوين أضاف لي كتير زي بالظبط ما انا ضفتله ...أحم...حبه غرور....

السؤال الخامس:-إيه اكتر حاجه كرهتها في التدوين؟
ج:- اتبحبح أنا بقى....عشان أن كرهت حاجات اكتر ما حبيت.... النفاق...حاجه واضحه جدا في عالمنا التدويني و دي حقيقة لا يمكن إنكارها إلا لو أنكرت وجود شمس منتصف الليل في إسكندنافيا.... و ده أسوأ ما يمكن في عالم التدوين... و بكرر الحمد لله أن حبايبي مش بينفاقوني و بيطسوا رأيهم في وشي سواء لايف او كومينت....مش بقولكم حبايبي....كرهت ايه تاني في التدوين...مممم... ركوب الموجه...او بمعنى تاني...ان الواحد يزيط في الزيطه..... بصراحه الموضوع ده أثار ضيقي بشكل كبير اوي....و حمدت ربنا اني مبزيطش في الزيطه....إيه تاني ...ممممم... لأ موضوع ان الواحد ينزل بوست كل يوم ما بيدايقنيش لأن في مدونات محترمة كتير اسلوبها و إطارها بيتطلب كده لأنهم بيتابعوا احداث جارية و بيعلقوا عليها...فمفيش مشاكل...ممممممم.......آخر حاجه.... المدونات فيها كتير ما يسموا بمدعي الثقافة... ومفهوم الثقافة عندنا مصاب بأمراض كتير....اللي بنتعامل معاهم على أساس أنهم مثقفين عشان بيتكلموا كمثقفين و بيتكلموا بلغة قراءاتهم...فدول بيمارسوا ما يسمى بالسفسطة او هم سفوسطائيين مش مثقفين.... و مدعي الثقافة ليسوا معدميها إنما هم محدودين للغاية فتتحرك ثقافتهم في نطاق ضيق محاولة التحرر من هذا النطاق فيختلقوا تمددا مطاطيا في اللغة و في طريقة التعبير محاولا جعل التافه من المعلومات اهمها و من القليل كثيره....ع العموم هما كتير اوي و لو فتحت التلفيزيون هتلاقي منهم و لو دخلت عالنت هتشوفهم ولو فتحت مدونات هتجدهم ولو فتحت الحنفيه هينزلوا منها....بيفكروني بالقناة الرابعه اللي بتيجي من غير آريال... بس اكيد قابلت مثقفين حقيقيين شموليين لشتى مناحي المعرفة زي اخويا و راجي و محمود نبيل و واحد كمان....بدون غرور بقول...انا بشوفه كل يوم الصبح في المرايه....مممم...بس كده..."غرور بزياده اوي"... :)
طبعا انا لا مثقف و لا حاجه يا اخوانا...انا على ادي خالص...

السؤال السادس:- حاسس أن التدوين ليه تأثير؟
ج:- تؤ....ناس -مع كامل احترامي و تقديري ليهم- بيتحركوا في الظل.... و مفتكرش في يوم يكون ليهم تأثير على النظام بشكل عام..... انا مش متحامل عليهم...يا خوانا انا واحد منهم
و التأثير اللي اقصده السياسي مش اكتر...لان ليهم تأثير كبير في مناحي تانيه كتير...و شكرا لحبيبه اللي نبهتني للنقطه دي......

السؤال السابع:- تهدي التاج لمين؟
ج:- لكتير و الله....اللي عايز يجاوبه يجاوبه...بس هخص ناس كده تقديرا ليهم....زي ...حبيبة و استاذتي محاسن صابر.... و طوبه دهب و طوبه فضة.... و سارة نجاتي... و محمد غاليا....و نيجار....و كوشيا..... و اي حد من الناس الحلوه اللي بتتابعني.... متأكد أن جالهم منه قبل كده فمش مهم يجاوبوه انما ده تقدير ليهم مني مش اكتر....

متشكرين كمان مره يا جوهري على انك ادتني الفرصه الحلوه دي.... وللناس الحلوة....ان شاء الله عود قريب....سلام...
رامي سعيد....

هناك 9 تعليقات:

نـــــور يقول...

لا حرام انا لسه كاتبه رد وصايه وراح ..راح ..خد املى وراح:((
امرى لله اكتبه تانى

اولا انا مش هاخد التاج لسبب هو مش لانى جاوبته قبل كده فعلا..ثؤثؤثؤ انما لان اهديتلك واحد وانت نفضتله يبقى انا كمان مش هجاوب ده p:
انا فعلا جاوبته ومش هبعتلك اللينك لانك مش فاضى تقرا اساسا ومتشكره اوى يارامى انك افتكرتنى وانك بتقدرنى وربنا يعلم انى كمان بحترمك وبعزك وبقدرك :)

وثانيا بقى خلينى اختلف معاك فى حاجتين تلاثه خمستاشر كده

1- الناس اللى بتعمل مدونه تقول فيها اكلت كرواسو وشربت شاى وصحيت من النوم نمت تانى دى بتبقى عاملاها علشان تفرغ فيها اللى بيحصل معاها من مواقف يمكن مش تقدر تحكيها للناس القريبين منها فى الحقيقه يعنى فضفات يمكن لانهم بيبقوا اوقات محتاجين يفضفضوا لحد ممكن يسمعوا منه كلمه حلوه تريحهم خصوصا لو اتوجد فى القلوب شويه حب فى الله لناس مش نعرفهم اساسا ولا عمرنا شفناهم.حب بيجى من الحكايات والروايات والافكار من ورا شاشات الكمبيوتر او اللاب توب او انترنت الموبايل على حد السواء:)

2- الحاجه التانيه انا شايفه ان التدوين ليه تأثير يمكن سه مابقاش تأثير قوى لانه لسه مش اتشهر واخد وضعه فى المجتمع اوى انما مجرد ان المدونين يعملوا حملات مش عارف جمع تبرعات ايه وزيارات مرضى ايه و احتجاجات ايه وكمان من اول مابدأت اعرف ان فى مدونين بيتسجنوا بسبب الى بيقولوه فى حق النظام ده خلانى اعرف ان صوتهم بيتسمع وبالتالى ليه تأثير اكيد حتى لو لسه مش اخد حقه

3-بخصوص الجزء ده"بس اكيد قابلت مثقفين حقيقيين شموليين لشتى مناحي المعرفة"
مين ضحك عليك وغشك وخدعك وقالك انك منهم؟! p:

متشكره جدا يارامى للمره التانيه وربنا مايحرمنى من سؤالك عنى ياسيدى
وبخصوص الزفته الامتحانات والله طالع عينى يارامى وبس بقى علشان هعيط
ربنا يعدى ويهون وادينى بكتبلك الكومنت ده وانا لسه راجعه مغمومه من الامتحان
الحمد لله هخلص يوم الاربع الجاى
انت بتدعيلى ولا لأ؟

صحيح يارامى انت ليك أخ مدون؟
ولو الاجابه يس هو مين ؟
يلا سلام بقى اما اروح اقفل الاتناشر ساعه نوم واجى
ويلا اى خدمه والله مش بعلق عند حد بس انت عارف انك ...... آخر حاجه:)

سارة نجاتى يقول...

رامى
أنا تقريبا مش مختلفة معاك و أنت عارف ده كويس , بس يمكن أسألك ايه موضوع نهى رشدى ؟ أنا طبعا شايفة أنا خد ضجة كبيرة لم يستحق الوضوع كل هذا , لكن وجود نهى بمينى جيب أو من غير جيب أصلا لا يعنى حد فى حاجة , و الحدث بتاعها على قد ما كبرناه على قد مالازم نقول أنه مهم , لأن فى تاريخنا اللى مليان تحرشات لما نفتكر بس فى 2008 نرفع قضية تحرش ده له دلالات و أبعاد لازم دراستها . و لما يطلع مدونين يعيبوا فى أخلاقها -بغض النظر عن أخلاقها- و يدافعوا عن المتحرش على أساس ده مبرر له , يبقى لازم نعرف نفسية المجتمع ده فيها ايه ؟؟ ناهيك عن الصور اللى اتعملت لها ع الفيس بوك و هى عارية تماما و ده برده أمر أخر جعل الحديث على نهى كثيرا .
ملحوظة : أنا لم أكتب عن نهى رشدى خالص هههههه
و ميرسى يا باشا ع التاج بس أنا مرة كتبت فى موضوع مشابهه خايفة أكون مكررة نفسى , ح أبحث الموضوع مع طقم السكرتارية بتاعى و أرد عليك ( شوية غرور من نفسى برده )ههههه
سلام يا جميل

طوبه فضه وطوبه دهب يقول...

انا احترمت اجاباتك اللى كلها صراحه ووضوح ومتشكره جدا على انك افتكرتنى وذكرتنى فى التاج دا شرف ليا انى اكون من الناس اللى بتقدرهم بس التاج دا انا جاوبت عليه قبل كده وياريت تشرفنى وتقلب عليه شويه لو فاضى فى موضوعاتى بعنوان تاج مش اى تاج ويارب يعجبك ومرسى مره تانيه واللى بتقوله عن نفسك مش غرور ولا حاجه بجد اسلوبك يستاهل دمت بكل خير اخى الفاضل

نـــــور يقول...

:))

لا مش كرهتك ياسوسه ماتخافش
انا اعقل من انى اخسرك علشان حته تاج لا راح ولا جه هو مكانه من امبارح

بخصوص انى وضحتلك حاجات كتير دى فانت طبعا مش لازم تشكرنى لان جمايلى مغرقه بلوجر وانت واحد من البلوجاريه -احم احم وش مغرور-

مش مهم يارامى هواياتك ايه ولا اتجاهاتك ايه المهم انك تكون عرفت تبق ناجح فى المنهج اللى انتهجته برضاك
وانا شايفه انك ماشاء الله فعلا مثقف وقناه سكسوك تى فى دى عامله معاك شغل :)

بخصوص التعب الف سلامه عليك ومش هقولك ان شالله كنت انا لانى اساسا عندى نفس التعب اللى بيجيلى كل شتا ومطلع عينى ومكنتش اعرف اسمه ايه؟
فانت بقى لو عرفت دواه ايه ابقى قولى عليه وخلينى انتفع من وراك شويه بدال ماانا مش عارفه استغلك خالص-ايوه حاكم انا استغلاليه مووووت وش وغد-

بخصوص الكوتشى ابو 250جنيه ربنا يعوض عليك ياخويا وباباك يعطف عليك ويديلك 250 غيرهم وكمان 50 بوناس علشان نفسيتك مش تتعب وانت كمان ارسم انك تعبان ومخنوق بسبب الموصوع ده يمكن البوناس يوصل 100 ولا حاجه
على فكره مره عرفت بالصدفه ان صحبتى اشترت كوتشى ب 270 جنيه اقسم بإنى مسحت بكرامتها الارض اه والنعمه هههههههه


طبعا قفلت 12 ساعه ووالله الحمد لله انا كنت مخنوقه علشان بس كنت مذاكره كويس والامتحان كان كويس لكن قدرلى انى اتعمى فى سؤال ومش اعرف انه مرتبط بسؤال تانى فخرفت بس ده مش يمنع انى حمدت ربنا كتير وشكرته ورجعت زى عادتى صليت ركتين الشكر على السراء والضراء
الحمد لله ياشيخ رامى الشيخه حبيبه كمان راضيه وقانعه :))
ربنا يديمها عليا وعليك نعمه

كده انا داينتك تانى بكومنت
اشطااااااااات :)
باى

Dr. Ibrahim يقول...

فعلا يا باشا النفاق على ودنه لدرجة انا اتخنقت...

ثانيا : فعلا عالم بيتحرك بدون فاعلية على الرأى العام..

ربنا يسعدك ويخليك لعالم التدوين..:)

مهرة سالم يقول...

طبعاماشاء الله إجاباتك صريــــــــحه...
وعشان كده حكون صريحه معاك ...
أنا أختلف معاك بأكثر من نقطه بس حقول على وحده بس..
وهي حرية التدوين...
........
إلي بيكتب عن يومياته أو حياته..
أيا كانت سخيفه بنظرك..
أو غير مهمه..
فهي مهمه له ..
زي ما أنت حر إنك تمسح مدونتك السابقه..
هم أحرار بإبقاء تدويناتهم ...
بالطبع أنت من تختار ما تقرأ ولاكن لم أحب لديك الإستخفاف بالآخرين ..
وإسمحلي على صراحتي...
.......
وأنا إيه إلي وقعني هنا أصلا ما كنت مرتاحه في مدونتك قصاصة ورق..
.....
دمت بخير..

مهرة سالم يقول...

لا يابرنس مش زعلانه منك...
وبالعكس إنت لازم تخلي الإجابات ....
لأنها قناعاتك...
ولأنها تعبر عن البرنس الصريح إلي عرفناه..
........
بس الموضوع لما قريت ماحسيتش بإلي إنته تقصدوه بس بعد شرحك إنت كده صح ومعاك حق..
..........
أنا بعتذر جدا إني مش بعلق دايما بس بجد بحاول دايما أقرا في قصاصة ورق..
وطلع عين نفسك دايما وأمتعنا..
هههههههه
........
دمت بخير..

الازهرى يقول...

اجاباتك جميلة
لانها رأيك بصراحة وبدون نفاق
صحيح انا مختلف معاك فى بعضها وباتفق مع اعتراض حيبة
لان انا شخصيا جيت هنا اكتب وافضض من الدنيا الموجود حواليا
وممكن اقول عليها هروب لكن ببعض التحفظ

تحياتى دوما

Dr.Mohammed Gohary يقول...

مساء العسل يا برنس
أو صباح الاشطة
حسب التقويم المحلي عندك


أولا متشكر عالبوئين اللي قولتهم في حقي
إنت تستحق أكتر من كدا
لإنك بجد بنى آدم محترم

خليني أشوف موضوعك وأعلق


----------------------------
بس لأنهم كتير بينقدوني و ده بيدفني لأدام

مممممممممممممممممم
هو كدا دفع ولا دفن
هههههههههههههههه

فاهم فاهم
واااااااصلة متقلقش
ههههههههههههههههه

---------------------------------

و التدوين أضاف لي كتير زي بالظبط ما انا ضفتله ...أحم...حبه غرور....

تبعا تبعا
هههههههههههههههههههه

---------------------------------

حبايبي مش بينفاقوني و بيطسوا رأيهم في وشي سواء لايف او كومينت

ههههههههههههههههه
ههههههههههههههههه
مش معلق
ههههههههههههههههه

---------------------------------

لو فتحت التلفيزيون هتلاقي منهم و لو دخلت عالنت هتشوفهم ولو فتحت مدونات هتجدهم ولو فتحت الحنفيه هينزلوا منها....بيفكروني بالقناة الرابعه اللي بتيجي من غير آريال

ليه يا عم مالها الرابعة
دي بتاعتنا يا عم
ههههههههههههههههه

شووووووف التامنة
هههههههههههههههه
الله يرحم أيام زمان

ولا السادسة بتاع طنطة
هههههههههههههههههههههههه
طنطة وليست طنطا
ههههههههههههههههههههه

---------------------------------

ناس -مع كامل احترامي و تقديري ليهم- بيتحركوا في الظل....

ما افتكرش
في مدونة لواحد اسمة وائل عباس
يا نهار ابيض
مشخرم الدولة
هههههههههههههههههههههههه

شوف يا عم كم الاعتقالات
عندك أبودومة اتلب سنة وغرامة ألفين جنيه
ههههههههههههههههههههههه

---------------------------------

متشكرين كمان مره يا جوهري على انك ادتني الفرصه الحلوه دي

يا برنس لينا الشرف


--------------------------------

إجابات ممتازة

ربنا يوفقك


تحياتي