الجمعة، 27 نوفمبر، 2009

تهنئة واجبه


كل سنه و انتو طيبين يا اخوانا
تلات تهاني ع السريع كده لحد ما اخوكم يروق و يصفي دماغه و يمخمخ و يبليكم ويبلي نفسه بموضوع جديد
اولا كل سنه و انتو طيبين عشان العيد و يا رب دايما بخير...(على فكره انا اسلوب كلامي ف الواقع مش كده خالص بس يالا ان شا الله ما حد حوش)

ثانيا مبروك عليا الاجازه أخيرا...يا خبر اسود يا جدعان...أربعتاشر شهر دراسه منهم اربعه جو امتحانات...حاجه عوء اوي و ربنا يستر الف مره ع النتيجه...خايف موت بس مش وقته...يا جدع عيشلك يومين...

ثالثا...مبرووووووك للواد أخويا ع الخطوبه... بنت زي العسل و يا رب دايما تمام... و طبعا لاني هنيت هنا ناس كتير على خطوباتهم مش ممكن استخسر ف اخويا يعني...مبروك يا كريم...مبروك يا نيفين... و بس كده

اشوفكم قريب ان شاء الله...بس شويه كده عشان النوم وحشني كصديق طال غيابه

كل سنه و انتم طيبين كمان مره و دمتم بخير....حلوه دمتم بخير دي

اشطااااااااااااااات

رامي سعيد

الأربعاء، 28 أكتوبر، 2009

طرف الخيط


أبحث عنها.... بين الوجوه أترقبها....في كل الفرص أتحينها....انتظرها في شغف....أترقبها في صبر لا جزع... أبحث عنها
*****
أبحث عنها... جميلة كحلم عذراء في خدرها المرمري و فرشها الوردي....جميلة كقصيدة شعر نظمت في مروج من اللؤلؤ....جميلة كملاك أبيض يرفرف بأجنحته النورانية....جميلة كالجمال نفسه...
أبحث عنها... لطيفة كأجمل الدعابات....لطيفة كنسمات صيف تدغدغ حواسك و تشعل المكنونات....
أبحث عنها...مثقفة...تقرأ لتولستوي و تبكي لحال بكويك....تلعن رومانسية ماركيز و تشفق على بؤساء هوجو....تفهم ذات صنع الله إبراهيم و تبكي لغروب بهاء طاهر...مثقفة ككتاب لم يفتح بعد....
أبحث عنها...ذكية كالثعلب...رشيقة كالغزلان... خفيفة كالفراشة...منطلقة كالجواد...محلقة كالسنونو...
أبحث عنها...مخلصة في حبها...لم تحب قبلي و لن تفكر في رجل بعدي... طاهرة كمريم العزراء أريد...
أبحث عنها...رقيقة كالطيف...تبكي لشعر لوركا و ترتجف لقصائد نزار....و حينما تقطف زهرة أمامها..فإنها تعلن الحداد...
*****
أبحث عن نصفي الآخر....أبحث عن الجزء الناقص من صورة قدري الغير واضحة....عن الطرف الآخر من الخيط.... فهل أجده؟!!
*****
أبحث و أبحث و أبحث و أخيرا وجدتها....و تأكدت بالفعل من أن أنها هي...
نعم هي من أبحث عنها...لكن للأسف...لست أنا من تبحث هي عنه...

*****
بريك تاني سريع و رجعت لحبايبي اللي بجد واحشني....خلصت الباطنه خلاااااااااااااااااص...بس لسه الأطفال كمان أسبوعين...هانت اهو يا جماعه و متنسوش أخوكو من صالح دعاؤكم

سلاااااااااااااااام
رامي سعيد

الخميس، 10 سبتمبر، 2009

HAVE A BREAK







أخيرررررررررا و بعد عناء و قرف و عوء رجعت... طبعا انا مبكتبش حاجه لاني بصراحه مفياش دماغ اكتب... يا اخوانا ادعولي من قلبكم بجد في صلاتكم في دي الايام المفترجه المستجاب فيها الدعوه بإذن واحد أحد ان ربنا يوفقني و يوفق جميع شباب المسلمين في الامتحانات دي....
يااااااااه.... بجد يا جماعه انا تعبان جدا و زي ما يكون مش كفايه الباطنه و مذاكرتها يجي كمان امراض و حر و صيام ربنا يعينا عليه و بوليكه كبيره جدا.... بجد بجد ربنا يعينا...
اول وقت مستقطع مستريح من فتره كبيره قدرت اخده و ده طبعا احتفالا اني خلصت ييجي تلت المنهج و لا حاجه...طبعا لا اخفيكم سرا ان منهج الباطنه لازم يتراجع حوالي تمانين مره عشان تفتكر منه كلمتين على بعض
عموما مش موضوعنا انا كاتب البوست ده عشان اقولكم وحشتوني بجد...انا حاليا في حالة تصالح رهيب مع النفس و حابب الخلق كلهم و بدعي لكل حد بييجي على بالي حتى لو كنت مخنوق منه او زعلان منه في حاجه نسيتهاله و بدعيله بجد... و اي حد عايز دعوه انا تحت امره

كمان كاتب البوست ده عشان اهني بعض الناس حبايبي بمناسبات حلوه في حياتهم بجد فرحت لهم و هم كالاتي:-
- حبييب قلبي النجم صالح مرسي....مبروك يا معلم الخطوبه كلاكيت تاني مره و ان شاء الله المره دي احسن من اللي فاتت و ربنا يعوضك خير يا اقرع...
-احمد عبد الحميد و احمد فكري و حازم سليمان....مبروك يا حبايبي و اصحابي بجد التخرج من الهندسه اللعينه "بترول-كهربا الزقازيق-اتصالات القاهره"...على الترتيب... و مبروك بجد ع الاعفا من الجيش... يا ولاد المحظوظه...
-نسمة "فرجينيا".... مبروك يا بنت خالي و ربيبتي الأثير ع الحجاااااااااااب.... بجد بجد ربنا يوفقك و يكرمك و يثبتك ع الهدايه اللي انتي فيها حاليا... اخر مكالمه منك اسعدتني جدا جدا لانها بجد طمنتني على انك ع الطريق السليم... و فكك بقى من حكاية الوحده و الاكتئاب...بجد كله بيعدي..
-الصديقه التونسيه نوال.... حمد الله على سلامة رجوعك لبلدك و يارب الايام اللي قضتيها في مصر تكون عجبتك و انا عن نفسي بجد مش هنسى اللحظات المرحه الحلوه اللي قضيناها انا و انتي و راجي... بجد معرفه طيبه و فرصه سعيده

و اخيرا مفيش اي كلام تاني... بس ادعولي يا حبايبي و اصحابي... حبيت احط الصور دي كنوع من المشاركه مش اكتر..و هم بالترتيب...
-صالح
-حازم
-نسمه "قبل الحجاب للأسف معنديش صور بالحجاب"
-نوال و أنا..." ميدان التحرير...شارع طلعت حرب... الواحدة إلا ربع صباحا...27 اغسطس 2009"...

ادعولي و هتوحشوني من هنا لحد كتييييييييييير اوي ادااااااام
سلااااااااام

رامي سعيد

الاثنين، 3 أغسطس، 2009

أركيديا


أتمنى أن اجلس إليك...احدثك....اقترب منك...ادخل محرابك المخلص الغير مدنس....أميل على اذنك...و اهمس..بكلمة الحب الخالده...و امنح جبينك قبلة مقدسة...و امنح هديتي...رباط الحب الأبدي...و عقد العشق الطاهر المقدس...و امنحك الشئ الوحيد الذي أملكه...أمنحك زهرة الأركيديا...
*****
من غير بعيد اراك قادمة...تمشين في ثوبك الوردي الفضفاض الذي أعشقه...خطواتك منتظمة كإيقاع موسيقي منغوم متزن...خبطات أرجلك الرشيقة تكاد تكون نسمات هادئة تدغدغ حواس بحر لجي مملوء باللؤلؤ و مغطى بالمرمر و معطر بالعنبر....تقتربين أكثر فأكثر...استشعر دقات قلبي كطبول حرب ضروس تقرع...تقتربين و تقتربين...تمرين إلى جواري فلا تلتفتين...لم أحزن و لم أجزع و لم أغضب..يكفيني فقط انني شممت عطرك الساحر الأخاذ...عطر الأركيديا...
*****
اقف وحدي في الظلام...الهث من فرط البرد و الزمهرير...وحيدا في تلك الساعة المتأخرة...و الكورنيش خال تقريبا...أراها...تتمايل من بعيد...ترتدي ما لا يستر و تستتر بما يشف...تقترب أكثر و الغواية تقترب معها...تتطاير الشهوة من عينيها فأدرك انها فقط انعكاس لعيناي...تقترب أكثر فاستشعر بأنفاسها العطرة على وجههي...تهمس من أعماق روحها:- أريدك... فكأنما صوت الرذيلة يتردد في كهف الخطايا المظلم...التفت بعيدا عنها...فأراه...هو شيخ كبير في عباءة سوداء...يبتسم ابتسامة معسولة و يربت على كتفي و يقول:- تقدم يا ولدي و خذها...إنها تريدك...ألا يكفيك أن يشتهيك من هو في جمالها...أجفل و ارتعش و اتمالك نفسي قبل أن أرد:- لكني أخاف الله...ابتسم ثانية قبل أن يقول:- أخطأ مرة ثم تب...إن الله غفور رحيم... أفكر مليا...و أقول:- الله ملك الملوك و قد يسامحني...لكنها لن تسامحني على خيانتها.... قال بإغراء:-لا تخف...تقدم و سيغفر لك الله و ستسامحك هي.... أفكر مليا قبل أن أشيح عنهما و استغفر الله العظيم بكلمات خرجت من أعماق قلبي...تبدل وجهه و انصرف غاضبا...و ابتعدت هي وانصرفت حزينة....لم أشعر بشيئا عندها...لكني فقط شممت عطر الأركيديا...
*****
أجلس إليك فأبكي و أقول :- إن حبك خطيئتي...
تردين معاتبة:- إذا ارجع عنها و تب...تخلص من خطيئتك و استغفر...
أرد ملتاعا:- أويحيا المرء بلا قلب؟!!
تبتسمين و قد أدركت مغزاي...تتركيني أقبل يدك قبل أن تهديني زجاجة عطر اشمها فإذا بها عطر الأركيديا...
*****
اقترب منك فتشيحين بعيدا عني... أحدثك فلا تردين... أصرخ فلا تكترثين... ابكي فلا تهتزين... و أخيرا ابتسمتي في سخرية قبل أن تقولي :- كل هذا وهم يا صديقي...
ارد مبهوتا:- و الأركيديا؟!
تبتسمين أخرى و تقولين :- إن الأركيديا لا رائحة لها أصلا....
*****

على طريقة الاعلانات
دلوقتي تقدر تقرا قصتي الجديده دندرمة على قصاصة ورق

عندي امتحان بكره و بعده ان شاء الله...ادعولي
رامي سعيد

الثلاثاء، 28 يوليو، 2009

السراب


اجلس و اتذكر...اجلس و أسائل نفسي...لماذا لا تولي الذكرى...لماذا لا يكافئني القدر بالنسيان...
اجلس و اتذكر...تتردد في ذهني أغنية حزينة...موسيقى شجيه...كلها تنطق فقط باسمك....و تهمس بين جنباتها بحبك...
اجلس و اتذكر...و في عقلي تتطاير كلمات محمود درويش المفزعة روعتها و هو يقول...أموت اشتياقا....أموت احتراقا...و شنقا أموت..و ذبحا أموت...و لكننى لا أقول مضى حبنا و انقضى...حبنا لا يموت....
اجلس و اتذكر...همساتي باسمك العطر مشفوعة بكلمة الحب الأبدي...فتسري رعدة في أوصالك تخفيها لكنى ألحظها...
اجلس و اتذكر...لمساتى الحانية ليدك الرقيقة متبوعة بتخضب وجهك الصبوح بحمرة الحياء المقدس...تشيحين بوجهك فتغرب الشمس عن كوني...
اجلس و اتذكر...دمعات شوقك على وجنتيك و قطرات حزنك في مقلتيك...فكأن الندى يرطب روحك يا حبيبتي...
اجلس و اتذكر...و لا أنسى
اسير في الطرقات...أبحث عن وجهك بين الربوع فلا أراه....فأبكي
اليوم رأيتك..أم عساي أقول رأيت من تشبهك...لا أدري...أغدا أدري؟!!
رأيتها من بعيد تمشي...تحتضن كتابها على طريقتك...تمشي مسرعة كمشيتك...تطرق خفرا كنظرتك...يضطرب وجداني...يخفق قلبي...تنسحب من روحي...يتسرب مني وعيي....أكد في السير ورائها...عساها تكون أنت...أمشي و أسرع الخطا...اقترب منها و لا أرى منها وجها...اهمس باسمك العطر...فلا ترد...أرفع صوتي باسمك الريحاني...فلا ترد...أصرخ فلا تسمع...اهمس و ارفع و اصرخ و ابكي...ولا أجد ردا...و حينما سبقتها و وقفت قبالتها...علمت إني اسعى وراء السراب...

مع شهيقي تعاودني ذكراك....و أبدا لا يخرج الزفير.... يخفق القلب شوقا للقياك....فقلبي لحبك أبدا أسير....

السبت، 13 يونيو، 2009

عندما بكى هو


في تلك اللحظة الخالدة
تعانقت الأعين...تشابكت الأيدي...
اضطربت الأفئدة...
تلامست الأرواح...
تهدجت أنفاسه و هو يهمس بكل عاطفة الدنيا : أحبك
و ليلا اختلى بنفسه وحيدا
عندها فقط بكى هو
بكى لأنه أخيرا قالها....
*****
في هذا اليوم المشئوم
شعر كمن تسحب الروح منه
شعر كمن ينزع قلبه من بين ضلوعه
شعر كمن يفقد بريق الحياة ذاتها
تماسك بقسوة أمام سيل دمعاتها المنهمر
و ليلا اختلى بنفسه وحيدا
عندها فقط بكى هو
بكى لأنه فارقها....
*****
تتعاقب عليه الأزمان
يلقاها صدفة تتهادي كالظبي
يتواثب قلبه في مكمنه
تتلاقي الأعين و من جديد تتعانق
تتهدج الأنفاس و هي تهمس بالتحية
و ليلا اختلى بنفسه وحيدا
عندها فقط بكى هو
بكى لأنه لا ينفك يحبها....
*****
يصادق من يصادق
و يعرف من يشاء
يحب أو يوهم نفسه بالحب...
يسافر و يجوب و يذهب و يعود
و يقنع نفسه بالبحث عن الحب
و ليلا يختلي بنفسه وحيدا
عندها فقط يبكي هو
يبكي لأنه يشتاق إليها
*****
مرت سنة و انقضى العام
يلقاها صدفة أخرى
يضطرب قلبه و يختلج في معقله
ينتظر التحية و عناق الأعين فلا يحدث
تمر بجواره و كأنها لا تراه
و ليلا اختلى بنفسه وحيدا
عندها فقط بكى هو
بكى لأنه أدرك يقينا...أنه بالفعل فقدها....
*******
اخيرا بكتب تاني...مش مهم بقى الكتابة عاملة ازاي المهم اني فضيت شويه... بس اللي شجعني و حمسني حاجه تانيه...حاجه فرحتني بجد...من كام يوم لقيت واحد ضايفني عال فيس بوك....قبلته عادي يعني...لقيته راجل مغربي و برنس كده...المهم لقيت شوية كلام رومانسي هو كاتبه في البروفايل بتاعه....قلت انا شفته فين قبل كده....لقيته مقدمة موضوع هي اللي كتبته من سنه و شويه...و الله انبسطت جدا و حسيت اني مش بكتب فراغ...واحد مغربي لا يعرفني و لا اعرفه و راجل عجبه الكلام و حبه و حطه كمان على بروفايله...حسيت بجد انه نجاح شخصي ليا....و انا بشكره و بشكر كل واحد بيتابعني و بيحب يشوف انا بكتب ايه جديد... و اعذروني ع الانتخه لانها خارجه عن إرادتنا كلنا....و سلاااااااااااااامو عليكو....
رامي سعيد

الاثنين، 6 أبريل، 2009

عام تدويني

كل سنه و انتم طيبين يا جماعه... و بالاحرى كل سنه و انا طيب.... و بالأخص كل سنه و المدونه دي طيبه.... اخص الخصوص بقى..كل سنه و البروفايل ده طيب... امبارح بس تميت عامي التدويني الأول...انا قلت قبل كده اني دونت سنه 2007 بس مكملتش و سبت المجال ده بسرعه اوي...و اتكلمت شويه عن الحكايه دي ف اول بوست في مدونتي الصغرى ((مراية))....المهم.... رجعت ادون في ابريل 2008 و بالتحديد خمسه ابريل....و لرجوعي قصه سريعه كده.... كنت مريت بأزمة نفسيه في حياتي و اكتئاب و هم.... و لأني كنت الحمد لله أذكى من اني استسلم للاكتئاب ...استسمرته...و كتبت مواضيع رومانسيه و جماعه اصحابي خدوها ينشروها في مجلات الكليه.... و اتنشرلي موضوع و رفضت انشر الباقي.... طبعا لرفضي اسباب شخصيه....و رجعت اكتب للمجالات دي اي حاجه بقى...ساخر- سياسي- اي بتنجان كده.... و شجعني اخ عزيز اسمه محمد الباز و قالي انت بتكتب رومانسي كويس...لدرجة انه كان عاوز يبعت حاجات ليا لمسابقة اخبار اليوم للقصه القصيره عن قصة مجرد لحظة (( ملحوظة:- حاليا القصه دي اي كلام بالنسبه لي و اسلوبها ركيك موت)).... المهم الباز قاللي مادام مبتنشرش اعمل مدونه.... فافتكرت التدوين و رجعت ادون تاني...بس كده....
المجتمع التدويني مجتمع محترم بنسبة 90% لان مش كل الناس حلوه.... الحمد لله كل اللي بيجولي ناس محترمه و جميله اوي.... انا احيانا بفوت على ناس وحشه كتير و دماغها اي كلام و مدعي ثقافه و عقل و ببقى متنرفز لما اقرالهم حاجه.... فيه برده حد عنده جنون عظمه بعض الشئ و شايف في نفسه العقل اللي هيغير العالم...طبعا حقه..بس الحكم يرجع في النهاية للقارئ و مش للكاتب ابدا.... بدليل ان انا اول واحد بينقدني قبل اي حد....بس في المجمل ناس محترمه....و سريعا هذكر الناس الحلوه دي و اقربهم ليا الصديقه العزيزه نور بتاعى قصاقيص حبيبه...حد محترم و جميل إلى اقصى حد...بتحب الخير جدا و بتقدر الصداقه و الاخوه.... كمان في استاذتي محاسن صابر و هي زي اختي الكبيره - بس انا مليش اخوات غير كريم اللي في جينيف دلوقتي- و فيه استاذه شمس النهار المتابعه الدائمة ليا و اللي دايما مشجعاني و فيه محمد باشا غاليا الراجل المحترم و سارة نجاتي و راجي رجب ((شهريار)) و رودي ودكتوره هابي مين كمان؟....ممممممم....مش فاكر و الله بس الناس دي كلها حبايبي و اي حد بيدخل بيبقاله نفس المعزة.... من خارج المدونين فأكتر ناس بتقرالي عبد الرحمن و صالح و البرنس محمود نبيل xp و ده ليه تقدير خاص لأنه اساسا قارئ نهم و قرا مليون كتاب لناس من بره و من جوه و مع ذلك-تخيلوا- بيعجب باللي انا بكتبه و بيقول عليا كويس .... ربنا يخليه يا رب و يوفقه
طبعا بدين للفضل في الكتابه اولا لله سبحانه و تعالى انه حط فيا قدره ع الكتابه و اداني موهبه حتى و لو بسيطه فالحمد لله على كل حال و اي حال.... ثم بقى لزميلتي في الكلية ياسمين و هي البنت الوحيده اللي ارتبطت بيها و أيا كانت العلاقة آلت لإيه فده اساسا اللي خلاني اكتب هنا و من ثم تدرجت و نميت شويه الموهبه و كتبت احسن و بقدم اعتذار ليها لاني ممكن اكون في لحظة غيظ كتبت هنا حاجات وحشه في حقها و بنقول اسفين اهو.... ثم لأخواتي و حبايبي اللي بيقرولي دايما و مشجعني ع الاستمرار
بعيد عن ده كله... وسط مدوناتي التلاته....بحب اكتر حاجه ((قصاصة ورق)) هناك بكتب زي ما انا عايز و مش مقيد بحاجه غير اني مبكتبش هناك غير قصص قصيره بس
اخ.... ورايا امتحان عملي نيورو بكره ان شاء الله و امتحان عملي شيست يوم الخميس ان شاء الله....لأ كده كفايه يا اخوانا و مش عايزين منكم بس غير الدعوات الحلوه اللي تلاقي باب سما مفتوح و استجابه من المولى تبارك و تعالى.... و جزاكم الله خيرا

اخيرا....كل سنه و انتو طيبين.....و اشوفكم على خير....في رعاية الله

الاثنين، 30 مارس، 2009

رحيل


رحلت و تركتني للمعاناة
تركت قلبي يقطر ألما
رحلت و تعتريني الذكرى
رحلت و روحي بحبك سكرى
تواريت بعيدا خلف الأفق
وراء سحاب يخضبه الشفق
وسط ظلام كعتمة النفق
و لو تعلمي....فإن رجوعك يحييني
فعودي....أو ارحلي
*****
رحلت و تركتني للشوق
و الشوق سياط للقلب
و الحب عذاب للروح
اذكرك ليلا...اذكرك نهارا
فاض الدمع مني مدرارا
صار نبع عيني أنهارا
ولا آآنس بغيرك جوارا
و لو تعلمي....فإن بعدك يدميني
فعودي....أو ارحلي
*****
أخرج نهارا من كهفي
اجوب الوديان و أقطع الفيافي
علني أشم منك عطرا
أو أحس من نبعك قطرا
و ارفع صوتي لأبعد مدى
فلا يجيبني سوى الصدى
و تبكيني الأزهار بالندى
و لو تعلمي....فإن الوصل يسليني
فعودي....أو ارحلي
*****
انتظر و انتظر و اشتاق
و أخشى ألا أمل الانتظار
اترقب عودتك في اشتياق
فقدومك لألمي ترياق
حبك لظلمة دربي منارات
و إن كنت كوكبا من الحسرات
فأنت قمر يسبح في مدراراتي
و لو تعلمي....فإن الهجر يشقيني
فعودي....أو ارحلي
*****
و ليلا تعاودني الذكرى
و يغرق الدمع وساداتي
و إن كان المستحيلات ثلاثا
فنسيانك -لهم- لرابع
فلك أنت يتفتح الياسمين
و لك وحدك تُقطر الرياحين
و في محرابك هلك العاشقين
و لو تعلمي....فإن حبك يكفيني
فعودي....أو ارحلي
*****
و أعلم علم اليقين
إنك لن تعودي
فإن كان رحيلك يبكيني
فإن سرورك يشجيني
فلن أقول لك عودي
لكن من قلبي أقول
ارحلي....... و لا تعودي
*****

الأربعاء، 11 فبراير، 2009

خداع بصري



رأيتها....لم أرها قبل هذا اليوم لكني رأيتها....نظرت حولي...ملت على أقرب صديق يجلس جواري و سألته هل سبق له رؤيتها قبل اليوم...فنفى...التفت حولي و لاحظت أنني تقريبا الوحيد المهتم بمرآها...أعود بنظري إليها...أتأملها....أتفحصها....أمسك بقلمي و أخط على أوراقي....كانت جميلة كحلم عذراء في خدرها الوردي....رقيقة كورقة من زهرة تيوليب قطفت للتو....بريئة كقطرة ندى على جبين وردة تستقبل إشراقة فجر جديد و طهارة أمل منبعث....عطرة كزهرة ياسمين سقيت بماء من الجنة....رشيقة كغزال خرج من أحراش الأمازون....هادئة كضوء شمس يتسرب في غرفتك وقت العصر و يدغدغ حواسك و يشعل كينونتك....تمشي في حياء كحياء ضوء الفجر و هو يتلقى الإذن من ظلمة الليل كي يحل محله....كانت جميلة رقيقة بريئة عطرة....كانت فينوس في أساطير الإغريق....كانت إيزيس في معتقدات الفراعنة....كانت الموناليزا التي خلدها دافينشي....كانت كليو باترا التي خلبت لب الطليان....كانت حميدة في زقاق نجيب محفوظ ....كانت تانيا التي من أجلها حرر "فاسيلي زايتسف" ستالينجراد من قبضة الرايخ...كانت مينا التي أيقظت الكونت دراكيولا من تابوته في عالم ستوكر الكئيب....كانت الأميرة فيونا التي عشقها شريك....كانت فيرمينيا داثا التي عاش فلورينتينو أريثا في معبد حبها الماركيزي....كانت سالومي التي فتنت القلوب و هي ترقص حول رأس يوحنا المعمدان....كانت فلورانس نيتنجيل في رقتها....كانت الجنيه في عوالم تلوكين....كانت صفيه في دير بهاء طاهر...كانت و كانت و كانت....كانت الجمال يمشي على قدمين....
أفقت من خواطري....انتزعني صوت ما....صوت يتشاجر...صوت يغلي بالحقد و الغضب...صوت أن دل على شئ فهو يدل على فساد خلقي و بيئة منحطة و أصل وضيع....و حينما رفعت رأسي و رأيت مصدر الصوت....عرفت إنني قد أحببت خداع بصري...

الأربعاء، 21 يناير، 2009

تحديث للtagging

سلام عليكم و عوده بعد توقف....للأسف العودة برده مش بكتابة أنما المره دي بتاج
يذكر اني غيرت اجابات كتير لان الناس زعلوا مني...هما برده ميعرفونيش عالطبيعه وانا ليا اسلوب غلس شويه في التريقه او الهزار...وللتوضيح برده فانا بتريق على نفسي في معظم الإجابات..محدش يزعل مني يا جماعه
....و للتوضيح السريع فإن تاج دي مش تاج الملك و لا تاج الجزيرة ولا تاج الدين...ده تاج ده بمعنى ((tagging)) اللي هي يعني ماركينج او توضيح او ما يوضع على السلعة لمعرفة سعرها...افتح المورد تلاقي الكلام الفاضي ده كله...ما علينا.... شكرا للأخ البرنس محمد الجوهري اللي أهداني التاج داهون...داهون طبعا امال ده ايه.... و ده شرف ليا يا معلم أنك افتكرتني و حطتني ضمن زمرة اختياراتك الكريمة.... وعلى غرار المنتديات...مشكووووور يا أخي.... هجاوب عال((تاجينيج)) و وعد إن شاء الله إني ارجع اكتب بقى عشان كفايى أنتخه كده
ومعلش مفيش الوان لأن البلوجر بايظ و مبيلونش ولا بيخطط و مش عارف اصلحه ازاي....

السؤال الأول:- بدأت التدوين إمتى و دخلت العالم ده إزاي؟...انطق اتكلم

ج:- مقدرش احدد تاريخ محدد...لأني بدأت مرتين...مرة في مارس 2007 و كان ليا مدونة ساخرة مش هقول اسمها و لا اسم البروفايل اللي انا حذفته أساسا.... رغم أنها كانت كتابات كويسه بس حذفتها و انا حر ... المرة التانية في ابريل 2008...و دخلت العالم إزاي...سمعت عنه فدخلته...سؤال غريب...

السؤال التاني:-إيه كان انطباعك في بداية التدوين؟

ج:- أولا حسيت بإثارة شديدة و حماس مشبوب ناحية الموضوع...خاصة مع بداية التعليقات و اهتمام البعض بكتاباتي....و كان اهتمامي بإني اطور من اسلوبي في المقام الأول...بس برضه مكانش فيه جمهور ...فبدأت أتابع بعض المدونات على أساس اجتذاب الناس بطريقة قرب قرب....فبصراحة جالي إحباط و خيبة أمل....لأني اكتشفت أن الوضع قائم على المجاملة الصريحة التي لا أبالغ لو وصفتها بالنفاق...و تلاقي كلام أقل ما يقال عنه أنه أهبل و التعليقات عليه فوق الميت ميتين تعليق... هتقولوا عليا حقود... لأ والله...أنا مش بحقد على العدد أنا بتكلم على اللي مكتوب في التعليقات من " الله عليك...جميل اوي...تسلم إيدك...سبحان العاطي الوهاب...أعد...إلخ.."... و فعلا بتلاقي الكلام واقع و مفهوش ريحة الأسلوب الأدبي.... عشان كده قررت إني اكتب عشان يبقى ليا مخزون كتابي موجود في أي وقت و جمهوري اللي بيتابعني و بيعلقلي ناس محترمة جدا اتشرف فعلا بمتابعتهم و اعتقد و لله الحمد أن تعليقاتهم عمرها ما شابها شبهة رياء مش لإني بكتب كويس...بس لأنهم كتير بينقدوني و ده بيدفني لأدام...ولاحظ تطور الأسلوب دلوقتي عن زمان...أعتقد إني حققت غاية كبيرة من التدوين...أنا بنجح فعلا....و الحمد لله

السؤال التالت:-مين أكتر حد بتحب تعليقاته ع البوست الجديد؟
ج:- الإجابة التقليدية...كلهم...أي حد بيعلق بحب تعليقه و احطه على راسي من فوق...ما عدا علاء ابن خالتي عشان بيخش انونيموس و بيكتب حاجات دمها تقيل فمبردش عليه و بعاقبه بطريقتي "بغلبه تسعه صفر في البلاي ستيشن"...بس اي حد بيعلق بيبقى بيس خالص و بيفرحني اخر حاجه
انا بتشرف بتعليق اي حد حتى لو نقدي.......

السؤال الرابع:-إيه اهم حاجات اتعلمتها م التدوين؟
ج:-ممم....عرفت ناس كويسة كتيييير اوي....ناس محترمة و على خلق....أسلوبي الكتابي تطور بشكل ملحوظ و بقى ليا فكر أدبي معقول...خاصة في مدونة قصاصة ورق صاحبة الشعبية الأكبر من دي.... و اعتقد أن ما أقدمه بيعجب الناس و بيحترموا إسلوبي اللي أنا لحد دلوقتي لسه مش راضي عنه..... و على فكرة انا عشان ارضي الناس الحلوه دي و احافظ على أسلوبي و مكانتي عندهم بيطلع عين أهلي و انا بجيب الفكرة و المحور و الأسلوب و البداية و العقدة و النهاية و الرمز و المغزى....شغلانه سوده يعني رينا يعيني عليها...بس انا بعتز بيها....و التدوين أضاف لي كتير زي بالظبط ما انا ضفتله ...أحم...حبه غرور....

السؤال الخامس:-إيه اكتر حاجه كرهتها في التدوين؟
ج:- اتبحبح أنا بقى....عشان أن كرهت حاجات اكتر ما حبيت.... النفاق...حاجه واضحه جدا في عالمنا التدويني و دي حقيقة لا يمكن إنكارها إلا لو أنكرت وجود شمس منتصف الليل في إسكندنافيا.... و ده أسوأ ما يمكن في عالم التدوين... و بكرر الحمد لله أن حبايبي مش بينفاقوني و بيطسوا رأيهم في وشي سواء لايف او كومينت....مش بقولكم حبايبي....كرهت ايه تاني في التدوين...مممم... ركوب الموجه...او بمعنى تاني...ان الواحد يزيط في الزيطه..... بصراحه الموضوع ده أثار ضيقي بشكل كبير اوي....و حمدت ربنا اني مبزيطش في الزيطه....إيه تاني ...ممممم... لأ موضوع ان الواحد ينزل بوست كل يوم ما بيدايقنيش لأن في مدونات محترمة كتير اسلوبها و إطارها بيتطلب كده لأنهم بيتابعوا احداث جارية و بيعلقوا عليها...فمفيش مشاكل...ممممممم.......آخر حاجه.... المدونات فيها كتير ما يسموا بمدعي الثقافة... ومفهوم الثقافة عندنا مصاب بأمراض كتير....اللي بنتعامل معاهم على أساس أنهم مثقفين عشان بيتكلموا كمثقفين و بيتكلموا بلغة قراءاتهم...فدول بيمارسوا ما يسمى بالسفسطة او هم سفوسطائيين مش مثقفين.... و مدعي الثقافة ليسوا معدميها إنما هم محدودين للغاية فتتحرك ثقافتهم في نطاق ضيق محاولة التحرر من هذا النطاق فيختلقوا تمددا مطاطيا في اللغة و في طريقة التعبير محاولا جعل التافه من المعلومات اهمها و من القليل كثيره....ع العموم هما كتير اوي و لو فتحت التلفيزيون هتلاقي منهم و لو دخلت عالنت هتشوفهم ولو فتحت مدونات هتجدهم ولو فتحت الحنفيه هينزلوا منها....بيفكروني بالقناة الرابعه اللي بتيجي من غير آريال... بس اكيد قابلت مثقفين حقيقيين شموليين لشتى مناحي المعرفة زي اخويا و راجي و محمود نبيل و واحد كمان....بدون غرور بقول...انا بشوفه كل يوم الصبح في المرايه....مممم...بس كده..."غرور بزياده اوي"... :)
طبعا انا لا مثقف و لا حاجه يا اخوانا...انا على ادي خالص...

السؤال السادس:- حاسس أن التدوين ليه تأثير؟
ج:- تؤ....ناس -مع كامل احترامي و تقديري ليهم- بيتحركوا في الظل.... و مفتكرش في يوم يكون ليهم تأثير على النظام بشكل عام..... انا مش متحامل عليهم...يا خوانا انا واحد منهم
و التأثير اللي اقصده السياسي مش اكتر...لان ليهم تأثير كبير في مناحي تانيه كتير...و شكرا لحبيبه اللي نبهتني للنقطه دي......

السؤال السابع:- تهدي التاج لمين؟
ج:- لكتير و الله....اللي عايز يجاوبه يجاوبه...بس هخص ناس كده تقديرا ليهم....زي ...حبيبة و استاذتي محاسن صابر.... و طوبه دهب و طوبه فضة.... و سارة نجاتي... و محمد غاليا....و نيجار....و كوشيا..... و اي حد من الناس الحلوه اللي بتتابعني.... متأكد أن جالهم منه قبل كده فمش مهم يجاوبوه انما ده تقدير ليهم مني مش اكتر....

متشكرين كمان مره يا جوهري على انك ادتني الفرصه الحلوه دي.... وللناس الحلوة....ان شاء الله عود قريب....سلام...
رامي سعيد....

الأحد، 18 يناير، 2009

romance spots


استمرارا لفترة الفراغ الطويييييله اوي اللي الواحد فيها دي... وتقريبا بسببها خسرت كتير من الناس الحلوة اللي بتقرا...اينعم انا عارف ان في كتير وراهم امتحانات و بتاع...بس انا منقطع عن الكتابه و عن المدونات عموما من فتره ومانيش عارف هرجع امته للكتابه و المتابعه...ارجو انكم تكونوا تمام...اوعدكم ان المره دي تكون اخر مره انزل فيها حاجه قديمه...البوست ده مش بطال من وجهة نظر اللي قروه...بس ان شاء الله اكتب تاني قريب... دعواتكم معانا يا اخوانا...
نشر هذا الموضوع في :- 7 إبريل 2008
ارجو ان يعجبكم....

· حينما تحب.... فأنت على الطريق الصحيح.....للضعف.
· رجل عذبه الحب.....تركه.....فقتله الفراق.
· حينما ينتصر قلبك على عقلك في صراع الحب.....فأنت فعلا تحب.
· بعد أن فقد كل شئ من أجلها.....فقدها هي.
· ضحى قلبه بكرامته.....حتى ضحت كرامته به وبقلبه.
· بعد أن شيد عالمه الخاص بصبر وقسوة.....هدته هي....ووقف هو يبتسم.
· عندما استيقظ قلبه من غيبوبته.....مات....فأدرك أنها كانت صحوة الموت.
· حينما يئس من قتل حبها لآخر.....قرر قتل حبه لها.
· علم أنه ضعيف....قرر الاستفادة من التجربة....فانتحر.
· القلب كائن حي....إذا كثرت جراحه.....مات.
· بين الحب والكره................جرح.
· لم يحزن لخسارة حبها له......لأنه من الأساس لم يحصل عليه.
· تغيرت أخلاقه,تبدلت طباعه,صار إنسانا آخر....يبكي الآن على قلب أدماه الجرح حتى الموت.
· الحب كالإنسان.....يولد وينمو ويكبر وفي النهاية.....يموت.
· قاعدة((1))في الحب:- لاتثق بأحد أبدا.....فاليد التي تحيي قلبك اليوم هي التي تقتله غدا.
· علاقة الحب كحوض الأسماك...يراها الجميع بصورة أكثر وضوحا.....عدا الحبيبين.
· قد ينهار البناء تماما لكنه لايمكن أن يقل طوله دون هدم....كذلك الحب.
· حينما تذكر جرحها له.....يكره اليوم الذي....جرحها هو فيه.
· قاعدة((2))في الحب:- لاتجرح احدا تحبه مهما جرحك هو....ففي النهاية سيندم على فعلته....وتكسب انت راحه الضمير.
· قلب المرأة مثل قلب الرجل.....كلاهما كالجواد.....لايحمل اثنين.
· من لم يحب....لم يستمتع بحياته بعد....وكذلك....لم ينجرح بعد.
· إذا لم يحم قلبك كرامتك.....فهو غير جدير بك.
· قاعدة((3))في الحب:- لاتحاول الظهور في صورة الملاك-حتى ولو كنت ملاكا بالفعل-فقد يعتبره الآخرون ضعفا.
كلمة أخيرة:- إذا جرح الحب قلبك.....سامحه.....واعطه الفرصة مره واثنان وعشرة.....فإذا استمر الجرح لاتقلق.....سيتنهي حبك......لانه قد مات قلبك

اعتذر بشده على اني مش عارف احط الوان تنضف شكل الموضوع و ده لتهييس الاخ البلوجر مش مني انا
و اعتذر كمان مره عن تأخري في الكتابة هنا نظرا لأن الكتابة في مدونتي التانيه بتاعة القصص القصيرة بتاخد مني مجهود حبتين
سلام يا جماعه