مكسور و حزين و لوحدي بتألم
عيني فعينيها...و تعدي و لا تسلم
مستغربين دلوقتي أنا ببكي ليه
أصل الجرح في قلبي لسه معلم
*****
قلبي دق...عرفت أنه للحب وجد
أتأكدت من حبي من غير لا دليل ولا سند
بتسألوني أنا ليه حزين دلوقتي
أصل حبي و هو في المهد أتوأد
*****
لا الوقت بيمر ولا بيعدي الزمن
الليلة فرحها و سابتلي حزن وشجن
حبيبتي لابسة فستانها الأبيض
و أنا النهارده لابس كفن
*****
قال إيه ماشي في شارع ضلمة
مجروح و حزين وحاسس بصدمة
مش عارف إزاي بس ارتاح
ده حبيبتي كانت ليا ظالمة
*****
بين جرح و جرح بعيش محزون
و في حب حبيبتي قلبي مسجون
بس كلي أمل إني أتحرر
يا ترى ممكن ولا ده حلم مجنون
*****
عايش وحيد وبين أهلي و مغترب
و كاس حزن مر ولا يتشرب
بس اللي مصبرني على جروحي
إني حاسس اني من نهايتي بقترب
*****
سألوني أنت لسه عندك أمل
قلبك انجرح و إيه العمل
قلت في سري أنتو مش فاهمين
حبها ملا قلبي و لروحي شمل
*****
من بعيد شفتها معاه
قلبي بكي و قلت آه
أنا ليه لسه فاكر حبنا
وهي دلوقتي خلاص نسياه
*****
عانيت و بعاني من فراق و نسيان
سألوني بتبكي ليه دلوقتي يا إنسان
من بين دموعي أنا قلتلهم
خلاص ما عدش ليا في قلبها مكان
*****
في المكان ده كان ليا قصة حب
هنا لمسة إيد وهنا دقة قلب
ده الحب ده حكايته حكايه
أوله ضحكه و آخره دمعه و غلب
*****
في الشباك بتقف بنت الجيران
جميلة و رقيقة تقولش لوحة فنان
بس قلبي انا مشغول بغيرها
مالحب جواب و ملهوش عنوان
*****
حسيت بالخوف وحش سانن سنانه
قلت اواجهه ووقفت ادامه
قررت أصارعه و بسيفي أغلبه بس
من خوفي درعي وقع وسيفي اترماله
*****
سألت نفسي ليه قدرت تنساني
يمكن عشان ظالمة وقلبها أناني
بس بعدها عني أكد لي
إنه في قلبها دلوقتي حد تاني
*****
قلبي من كتر حبه انجرح
لا شاف فيوم لا ضحكه ولا فرح
رغم إني خلاص مش على بالها
إلا أنه في حبها عقلي سرح
*****
شعرها ناعم تقولش حرير
ورا ضهرها بيرفرف وبيطير
طبعا وقعت في حبها
وبرجلي دخلت عش الدبابير
*****
في ليلة برد وعتمه ومطر
والحزن جوا روحي انسطر
حاسس بوحدة وحاسس بألم
ده الجرح في قلبي خلاه انفطر
*****
هناك 8 تعليقات:
أييييييييييييييييييييوه كدا ياعم
ظبطنا كدا وأكتب هنا في المدونه دي شويه
أنا قولتلك أنا بحبها أوي
وكنت كل شويه أدخل وألاقيها مافيش جديد
أوعي تنسانا ياعم ونبي وكل ما تمتحن شفوي كدا زي أمبارح أبقي قبل ما تبدأ مذاكره في الماده الجديدة أكتبلنا كام حاجه كدا
مااااااااااااااشي
ربنا معاك يارب في الرممممممممممد
أووووووووووووووووووووووووووووووف
بكرهه مووووووووووووووووووووووووت
هي بجد أتجوزت ولا أيه
دي اتخطبت بس ياعم يعني لسه فيه أمل
ههههههههههههههه
اي اي اي من غير ضرب بهزر بهزر
معلش أنا رغاي أوي بس نسيت أقولك حاجه
أبقي كتر من اللون الاحمر
بجد والله بيخلي شكل المدونه حلو وهو أصلا لون روعة
يعني بص كدا علي الموضوع بتاع نسمة بالورد بتاعه باللون الاحمر اللي في أخر الموضوع اللي قبله
تحس أنه شيك كدا
هو ممكن تعتبرني ماقولتش حاجه يعني لو أنت مابتحبش الأحمر
بس يعني كنت بقولك أنه شكله شيك أوي
مساء الجمال بالاوي يا غالي... ازيك و عامل ايه... الرمد مهما كان وحش فهو احسن من الكوميونيتي ابن ال... ما علينا...ان شاء الله كل ما اخلص شفوي هكتب بس مش هينفع بعد الرمد عشان بين الشفوي والانف واذن اسبوع بس فلو كتبت هشيل خيار بجد...واديني بكتبلك اهو في المدونه دي وقالب التانيه شويه ولو اني كاتبلها حاجات حلوه...
ههههههههه...اه اتخطبت بس....بس برده مفيش امل...ما هي كانت فاضيه...هههههههههه...والله بجد دي الانسانه الوحيده اللي بجد بحس انها صديقه ليا...لا ينفع المرتبه دي لا تزيد ولا تقل...
اللون الاحمر حلو وبحبه وبيدي شياكه عارف-ما هو اكيد حلو وإلا ما كنتش حطيته اصلا- بس انا بحطه للحاجه اللي عايز ابينها او زيادة تخطيط حاجات معينه وحاجات في دماغي كده... انما مينفعش مثلا اكتب موضوع حزين وقاتم واحطله ورد احمر والوان شفتشي... هفقد مصداقيتي...ويا سيدي متخافش ان شاء الله هبقى ازودلك منه عشان انت كمان تزود زياراتك
متشكرين اوي عالدعوه اللي بتدعيهالي ماهو ده العشم برده
سلام و خليني دايما اطمن عليك
قشطات
السلام عليكم
كلام جميل اوى اوى كل فقرة بتحمل معنى روعة تحس انها قصة لوحدها خصوصا الفقرة دى
عايش وحيد وبين أهلي و مغترب
و كاس حزن مر ولا يتشرب
بس اللي مصبرني على جروحي
إني حاسس اني من نهايتي بقترب
قريبة ليه اوى الفترة الا فاتت والا جاية
متشكرةجدااا على سؤالك
بس سؤال يعنى ايه معنى العنوان
لك تحياتى
سلام عليكم يا نوران
متشكر جدا على عودتك لتشريفك ليا مره تانيه... ومتشكر جدا جدا على رايك الجميل ده...معنى العنوان...مشتق من صلاح جاهين الشاعر العظيم بتاع الرباعيات...فمني خدت برنس ومنه خدت جاهين فبقت برنسجاهينيات...و7 لانها سابع فقره منها عشان كتبت سته قبلهم يا ريت تشفويهم
متشكر على زيارتك...
تحياتي
السلام عليكم
اولا الشرف ليا انى بجد دخلت البلوج بتاعك ومتشكرة على تفسير العنوان وانا قرات الستة الا قبل كده بس كنت عايزة اسأل معنى العنوان ايه ووالحمد لله عرفته
ومتشكرة على تشريفك ليا ورايك
وبالنسبة للصوت ماينفعش اكتب htmlفى التعليق
بس ده موقع هتلاقى فيه الكود انا وخداه منه
http://ta3leem-khaled.blogspot.com/2007/03/blog-post_109.html
اتمنى انه يفيدك وتنزل الصوت
لك تحياتى وبالتوفيق
عليكم السلام يا نوران....والله انا متشكر جدا على اهتمامك و افادتك ليا والله بجد مش عارف اشكرك ازاي...بس الجاهل جاهل وبرده مش عارف انزل صوت..ههههههه...يالا مش مشكله بقى...الحاجه اللي هتعجبني هكتبها في الجنب احسن...حتى الكلمات تتفهم...
متشكر اوي كمان مره و نوريني دايما
سلااااام
إرسال تعليق